AM152
True Gamer
الاسم : Versus
النوع: أكشن، خيالى
تاريخ بدء النشر : نوفمبر 2022
معدل الصدور : شهرى (صدرت خمس شباتر وقت كتابة الموضوع)
المؤلف: One و من أعماله المانجا الشهيرة Onepunch man و Mob Psycho 100
الرسام : Azuma Kyoutarou و من أعماله The King of Fighters
نبذة عن المانجا :
فى عالم البشر فيه على وشك الإنقراض من قبل ال Demons بيتم عمل محاولة أخيرة لمواجهتهم بتكوين 47 فريق من الأبطال لمواجهة ال 47 Demon Lord اللى بيتحكموا فى العالم مع قائدهم The Great Demon Lord ، البطل Hallow تم تكليفه بالمنطقة رقم 11 و اللى بيتوجه ليها مع فريقه بالرغم من مخاوفه بس التطورات اللى هاتحصل بعد كده تبقى شئ خارج تفكير أو حسابات أى حد و الأبطال هيلاقوا نفسهم فى وضع جنونى
فكرة عامة :
فى البداية ماظنش إنى محتاج أكتب تعريف عن One و أعمال مشهورة بما فيها الكفاية بس بصراحة كنت متردد فى فتح الموضوع ، أولا لأن العمل يعتبر فى بدايته و ممكن بسهولة ياخد اتجاه مخيب للآمال أو حتى يتكنسل و ثانيا لأن النشاط محدود فى معظم مواضيع المانجا بس بصراحة حبيت جدا الفكرة اللى العمل قدمها و شايف إنها كفاية فى حد ذاته لإلقاء نظرة عليه حتى لو مستواه تدهور بعدها و حبيت ألفت النظر ليها و المرة دى One بياخد إتجاه مختلف عن أعماله السابقة (و ممكن حتى يعتبر العكس) ، بالنسبة للرسم فالمرة دى One بيتعاون مع رسام مختلف و المستوى اللى بيقدمه جيد حتى الآن
العمل بيبدأ بفقرة قصيرة عن فكرة العدو الطبيعى لفصيلة ما زى الثعبان بالنسبة للضفدع و إزاى إن فكرة هزيمته مستحيلة و إن العدو الطبيعى للبشر هو ....... ، اسم العدو مش واضح الشئ اللى استغربت منه فى البداية بس ده معناه هايتضح بعدين ، البداية نفسها تقليدية مع الفكرة المعروفة لمواجهة الأبطال لل Demon Lord بس مع تقدم الأحداث بتبتدى تكتشف تدريجيا إن الوضع مختلف تماما و ده مع سلسلة مع التويستات و المفاجآت اللى هتاخد العمل فى إتجاه غير متوقع و ده حرق بسيط لفكرة العمل لو مستعجل 13 عالم كل واحد فيه نوع من البشر بيواجه خطر الإنقراض نتيجة عدو طبيعى مختلف و أقوى منهم بمراحل و العوالم هايندمجوا مع بعض فى عالم واحد و تبقى مواجهة شاملة
الأفكار و الثيمات اللى بيقدمها العمل مش جديدة فى حدا ذاتها بس طريقة جمعها و تقديمها فى عمل واحد لعمل مواجهة ب Scale مهول يبقى هو الشئ المميز فى العمل و العمل بينجح فى إنه يجذب الإنتباه و يخليك تهتم بيه و تتخيل السيناريوهات المختلفة اللى ممكن يمشى فيها و إن كان ده فى نفس الوقت الشئ اللى بيخلينى قلقان لأن مع ال Scale الكبير و الأطراف الكثيرة فالقصة ممكن تخرج من يد الكاتب و تنهار بسهولة خاصة إن تركيزه المرة دى على شئ مختلف و مش عارف هل هايقدر ينجح فيه أم لا بس كما ذكرت العمل يستحق التجربة و اتمنى إنه يكمل على كده